Radionu özünə yol yoldaşı edənlər yaxşı bilirlər: Dinləyicinin qəlbinə gedən yol gözəl musiqidən və səsdən keçir. Qərb regionunun dinləyicilərinin mənəvi qidası da yubiley yaşında olan Kəpəz FM-dir. Azərbaycanın ilk regional radio kanalı olan “Kəpəz FM” 2013-cü ilin 5 fevralında Gəncə şəhərində 24 saatlıq yayıma başlayıb. Həftə ərzində beş gün sabahı “Gəl ey səhər”lə açanlar, günorta naharını “Vaxt bizim, söz sizin”lə edib təbriklərini, etiraflarını çatdırırlar, işdən qayıdanlar isə “Bu axşam” verilişi vasitəsilə yorğunluqlarını çıxarırlar. Həftə ərzində www.kepezfm.az saytında səs toplayaraq ən çox dinlənilən musiqiçilərin ifaları isə “Milli 20” və “Top 202 hit-paradlarında yer alır. Gün ərzində səkkiz dəfə dünya və ölkə gündəmində baş verən ən son xəbərlər “Kəpəz Xəbər”də çatdırılır. “Kəpəz FM” radiosu yayıma başladığı gündən etibarən dinləyicilərdə musiqi zövqünü formalaşdırmaq, maarifləndirmək missiyasını öz üzərinə götürüb. Dinləyicilər də bu hədəfə doğru irəliləyərkən hər zaman yanımızda olublar.
Fərid Mehdiyev