İki il öncənin 5 oktyabr tarixində, Vətən Müharibəsinin 9-ci günündə Azərbaycan Ordusu Cəbrayıl rayonunun Şıxəli Ağalı, Sarıcalı, Məzrə kəndlərini və müxtəlif istiqamətlərdə bir neçə strateji yüksəkliyi azad edib. Həmin gün səhər saatlarında Ermənistanın Berd rayonu ərazisindən Gəncə şəhəri raket atəşinə tutulub. Nəticədə 3 mülki şəxs müxtəlif dərəcəli bədən xəsarətləri alaraq xəstəxanaya yerləşdirilib, mülki infrastruktura külli miqdarda ziyan dəyib. Ermənistan Silahlı Qüvvələri tərəfindən Beyləqan şəhərinə də 2 ədəd raket atılıb. Mərmilərdən biri uşaq bağçasının həyətinə düşüb. Bərdəyə atılan raket mərmisinin qəlpələrindən isə 1 nəfər həlak olub, 3 nəfər yaralanıb.