Dünən Prezident İlham Əliyev Gəncə şəhəri və Şəmkir rayonu ərazisində Qərb Sənaye Parkının yaradılması ilə bağlı Fərman imzalayıb. Dövlət başçısının Fərmanı ilə yaradılan Qərb Sənaye Parkının bölgənin iqtisadi inkişafında mühüm rol oynayacağı bildirilir. Bu barədə İqtisadiyyat Nazirliyinin İctimaiyyətlə əlaqələr şöbəsinin əməkdaşı Əli Məhərrəmli Kəpəz FM-ə müsahibə verib:
Əli Məhərrəmli- İqtisadiyyat Nazirliyinin İctimaiyyətlə əlaqələr şöbəsinin əməkdaşı: "Dövlət başçısının Fərmanı ilə yaradılan Qərb Sənaye Parkı bölgənin iqtisadi imkanlarından səmərəli istifadəyə, istehsalın artırılmasına və sahibkarlığın genişlənməsinə xidmət edəcək. Sənaye Parkı həmçinin, yeni iş yerlərinin yaradılmasına və əhalinin rifahının yaxşılaşmasına töhfə verəcək. Dövlət tərəfindən zəruri infrastrukturla təmin ediləcək parkda müasir texnologiyaların tətbiqi və investisiyaların cəlbi regionun davamlı və uzunmüddətli inkişafına əlavə imkanlar yaradacaq".