2020-10-22 18:04
Azərbaycan Xarici İşlər Nazirliyi Ermənistanın münaqişə zonasından çox uzaqda yerləşən Azərbaycanın yaşayış məntəqələrinə hücumlarının davam etməsinə dair açıqlama yayıb. Bildirilib ki, Gəncə və Mingəçevirdən sonra Azərbaycanın işğal olunmuş ərazilərindən xeyli kənarda yerləşən Siyəzən, Kürdəmir və Qəbələyə doğru raketlərin atılması Ermənistanın Azərbaycan dinc əhalisinə qarşı yeni dəhşətli cinayətlər törətmək üçün növbəti cəhdidir. Bu hücumlar bir daha Ermənistanın münaqişə zonasının coğrafiyasını genişləndirmək cəhdlərindən xəbər verir və onun vəziyyəti daha da gərginləşdirməyə xidmət etdiyini göstərir. Ermənistan rəhbərliyi bölgədə gərginliyin artmasına, habelə Ermənistanın Azərbaycana qarşı yeni təcavüzü zamanı törədilən müharibə cinayətlərinə görə tam məsuliyyət daşıyır.
Nərgiz Camal