Kopenhagendə "Avropa Siyasi Birliyi"nin 7-ci Zirvə toplantısı çərçivəsində Azərbaycan Prezidenti İlham Əliyev ilə Ermənistanın Baş naziri Nikol Paşinyanın görüşü baş tutub. Görüşdə tərəflər Vaşinqton Sülh Sammitində əldə olunan razılaşmaların əhəmiyyətini vurğulayıb, sülhün möhkəmləndirilməsi istiqamətində səylərini təsdiqləyiblər. Azərbaycan və Ermənistan liderləri regionda nəqliyyat kommunikasiyalarının faydalarını müzakirə edib, infrastruktur layihələrinin gedişatını və Vaşinqton Bəyannaməsinin icrasını nəzərdən keçiriblər. Tərəflər ATƏT-in Minsk prosesi və əlaqəli strukturların ləğv olunmasını alqışlayıb, etimad quruculuğu tədbirlərinin davam etdirilməsinin vacibliyini qeyd ediblər və təmasları davam etdirmək barədə razılığa gəliblər.