Gəncədə futbol oynayan istedadlı uşaqların sayı çoxdur. Bunu “Kəpəz” Futbol Akademiyasının koordinatoru Vasif Vəliyev bildirib. Onun sözlərinə görə, klubun Məşq Mərkəzində keçirilən iki günlük seleksiya prosesində 180-ə yaxın uşaq iştirak edib. Seçimlər əsasən 2008–2014-cü il təvəllüdlü uşaqlar arasında aparılıb və 10-a yaxın futbolçu ilkin mərhələni uğurla keçib. Vasif Vəliyev qeyd edib ki, akademiyada yetişən futbolçular qısa müddət sonra əvəzedici komandaya cəlb olunur və gələcəkdə əsas komandada oynamaq şansı qazanırlar.