2021-06-02 18:09

Müdafiə Nazirliyi və Dövlər Sərhəd Xidməti ermənilərin növbəti təxribatı barədə birgə məlumat yayıb. Ötən gün saat 20 radələrində Ermənistan silahlı qüvvələri təqribən 40 nəfərə yaxın şəxsi heyətlə Kəlbəcər rayonunun Armudlu kəndi istiqamətində 400 metr Azərbaycan ərazisinə daxil olub və mövqe tutublar. Silahlı qüvvələrimizin dərhal həyata keçirdiyi tədbirlər nəticəsində Ermənistan silahlı qüvvələri silah tətbiq edilmədən ölkəmizin ərazisindən çıxarılıb. "Bu növbəti təxribatdır və bunun məsuliyyəti tam şəkildə Ermənistan tərəfinin üzərinə düşür. Baş verən hadisə bir daha onu göstərir ki, Ermənistan iki ölkənin dövlət sərhədi boyunca vəziyyəti gərginləşdirmək məqsədini güdür. Dövlət sərhədlərinin pozulması və ölkəmizin ərazisinə Ermənistan silahlı qüvvələrinin müdaxiləsi hallarının qarşısı bundan sonra da qəti tədbirlər vasitəsilə alınacaq" - deyə məlumatda qeyd olunur.

Nərgiz camal