İrandakı Səfirliyimizə qarşı həyata keçirilən terror hücumunun beynəlxalq səviyyədə pislənməsi və terror aktını təşkil edənlərin tezliklə cəzalandırılması ilə bağlı müvafiq sənədlər qəbul edilmək məqsədilə aidiyyəti beynəlxalq təşkilatlar və platformalara təqdim edilib. XİN-in məlumatına görə, hücumdan dərhal sonra Qoşulmama Hərəkatının Əlaqələndirici Bürosuna və Asiyada Qarşılıqlı Fəaliyyət və Etimad Tədbirləri üzrə Müşavirəyə Azərbaycan tərəfindən təqdim edilmiş kommünike və bəyanat layihələrinə İran tərəfi etiraz edib və bu sənədlərin qəbuluna mane olub. Qoşulmama Hərəkatında 120 ölkə arasından İranın mövqeyinə dəstək verən yalnız, Suriya və Hindistan olub. "İran tərəfinin bu təxribatçı addımını pisləyir və beynəlxalq öhdəliklərinə riayət etməsinin zəruri olduğunu bildiririk. Azərbaycan tərəfi səfirliyinə qarşı terror aktının geniş şəkildə pislənməsi və terror aktını törədənlərin cəzalandırılması üçün bütün müvafiq beynəlxalq platformalardan istifadə edəcək", - deyə nazirliyin məlumatında vurğulanıb.