Prezident İlham Əliyev və birinci xanım Mehriban Əliyeva Şuşa şəhərində Yuxarı Gövhər Ağa məscidini ziyarət edib, aparılan yenidənqurma və bərpa işləri ilə tanış olublar. Prezidentin köməkçisi Anar Ələkbərov görülən işlər barədə məlumat verərək Ermənistanın işğalı dövründə məscidə edilmiş müdaxilələrin aradan qaldırıldığını qeyd edib. Fasadlarda və binanın daxilində suvaq işləri başa çatdırılıb. Hazırda Şuşa şəhərindən Bakıya gətirilmiş sal qaya parçalarından emalatxanada pəncərə haşiyələrinin daş kəsimi və fiqur hazırlanması işləri davam etdirilir. Bərpa işlərinin 2023-cü ilin sonunadək yekunlaşdırılması nəzərdə tutulur.