Ermənistanın Bərdədə törətdiyi növbəti terrordan iki il ötür
İki il öncənin 28 oktyabr tarixində, Vətən Müharibəsinin 32-ci günündə Prezident İlham Əliyev özünün rəsmi "Twitter" səhifəsində Azərbaycan Ordusunun Zəngilan, Cəbrayıl, Qubadlı rayonlarının bir neçə kəndini işğalçılardan azad etməsi ilə bağlı paylaşım edib. Tərtər, Tovuz, Gədəbəy, Daşkəsən və Qubadlı artilleriya atəşinə tutulub. Ermənistan Bərdə şəhərinə kasetli bombalardan istifadə etməklə zərbələr endirib. Nəticədə 21 nəfər həlak olub, 70-ə yaxın şəxs yaralanıb, şəhərdə yerləşən mülki infrastruktur obyektlərinə və nəqliyyat vasitələrinə külli miqdarda ziyan dəyib. Dinc əhalini atəşə tutan düşmənin canlı qüvvəsi sərrast atəşlə məhv edilib. Qubadlı istiqamətində düşmənin atıb qaçdığı hərbi texnika və silah-sursatın videogörüntüsü yayılıb.