"Azərbaycan 10 noyabr 2020-ci il tarixli üçtərəfli bəyanata uyğun olaraq, bölgədə dayanıqlı sülh və sabitliyə nail olmaq istiqamətində tədbirlər görür. Bunun əksi olaraq, Ermənistan revanşizm mövqeyi sərgiləyərək üzərinə götürdüyü öhdəlikləri tam icra etmir, hərbi təxribatlarını davam etdirir və beləliklə də post-münaqişə normallaşma cəhdlərinə ciddi xələl gətirir. Xarici işlər Nazirliyi 27 sentyabr - Anım Günü ilə bağlı bəyanatında Ermənistanı bölgədə sülh, təhlükəsizlik və rifahın təmini naminə fundamental prinsiplərə hörmət etməyə, beynəlxalq öhdəliklərinə əməl etməyə çağırıb. "Bölgənin sülh şəraitində inkişafının başqa alternativi mövcud deyil", deyə bəyanatda qeyd edilib.