2020-11-01 10:00
Ermənistan silahlı qüvvələrinin bölmələri Ermənistan-Azərbaycan dövlət sərhədində yerləşən Ordumuzun bölmələrinin mövqelərini artilleriya, minaatan və atıcı silahlardan atəşə tutub. Bu günə keçən gecə müxtəlif vaxtlarda Ermənistanın Berd, Çəmbərək və Gorus rayonlarından Tovuz, Gədəbəy və Qubadlı rayonlarında yerləşən ordu bölmələrimizin mövqeləri atəşə tutulub. Müdafiə Nazirliyindən o da bildirilib ki, dünən gün ərzində və bugünə keçən gecə düşmən cəbhənin müxtəlif istiqamətlərində Ordumuzun bölmələrinin yerləşdiyi mövqeləri və yaşayış məntəqələrimizi müxtəlif silahlardan, o cümlədən artilleriya və raketlərdən atəşə tutub. Döyüş əməliyyatları əsasən cəbhənin Ağdərə, Ağdam, Xocavənd və Qubadlı istiqamətlərində davam edib. Cavab tədbirləri nəticəsində düşmənin şəxsi heyəti arasında xeyli sayda itki var. Sutka ərzində cəbhənin müxtəlif istiqamətlərində düşmənin canlı qüvvəsi, 1 PDM, 2 BM-21 “Qrad” yaylım atəşli reaktiv sistemi, 8 müxtəlif tipli topu, 2 rabitə qülləsi, 5 avtomobil texnikası məhv edilib. Qoşunlarımız əməliyyat şəraitinə nəzarət edir.
Nərgiz Camal