Dünya çempionatında bu gün qrup mərhələsinə yekun vurulacaq. G və H qrupunun oyunlarından sonra 1/8 finalın bütün iştirakçıları bəlli olacaq. Oyunları saat 19-da başlayacaq H qrupunda minimum vəzifənin öhdəsindən gələn Portuqaliya millisi Cənubi Koreya yığması ilə üz-üzə gələcək. Digər oyunda isə Qana və Uruqvay seçmələri münasibətlərinə aydınlıq gətirəcəklər. Afrika təmsilçisi qələbə sayəsində 1/8 finala yüksələ bilər. G qrupunda isə pley-offa vəsiqəni təmin edən Braziliya yığması Kamerunla qarşılaşacaq. Digər matçda isə İsveçrə seçməsi Serbiyanı sınağa çəkəcək. İsveçrəlilər qələbə qazanacaqları halda, Kamerun - Braziliya görüşünün nəticəsindən asılı olmayaraq, mərhələ adlayacaqlar. Hər matçın startı saat 23-də veriləcək.