Dünyanın müxtəlif ölkələrində yaşayan azərbaycanlılar İkinci Qarabağ müharibəsi dövründə Ermənistanın mülki insanlara qarşı törətdiyi hərbi cinayətlərə etiraz olaraq aksiyalar keçiriblər. Türkiyə, Çexiya, Şotlandiya və İsraildə təşkil edilən aksiyalarda Gəncə, Naftalan, Bərdə, Tərtər, Mingəçevir və digər şəhərlərinə raket hücumları nəticəsində həlak olan mülki vətəndaşların xatirəsi yad edilib. 12-si uşaq, 27-si qadın olmaqla 93 mülki şəxsin həlak olması, 454 nəfərin müxtəlif dərəcəli bədən xəsarətləri alması ilə nəticələnən insanlığa və sülhə qarşı törədilmiş bu cinayətlər hiddətlə pislənilib. Tədbir iştirakçıları beynəlxalq birliyi bu dəhşətli hadisələrə adekvat reaksiya verməyə, Ermənistanda bu cinayətlərə cavabdehlik daşıyanların məsuliyyətə cəlb olunması istiqamətində qətiyyətli addımlar atmağa çağırıb.