Daxili İşlər Nazirliyi Polis Akademiyasının “hüquqşünaslıq” ixtisası üzrə əyani təhsilə 300 kursantın qəbulunu elan edir. Müsabiqədə tam orta məktəblərin buraxılış siniflərində oxuyan və ya tam orta təhsilli, 16 yaşdan 18 yaşadək gənclər iştirak edə bilər. Sənədlərin qəbulu yanvarın 23-dən martın 4-dək saat 10:00-dan 17:00-dək şəhər/rayon polis idarə və ya şöbələrində həyata keçiriləcək. Müsabiqəyə buraxılan abituriyentlər Dövlət İmtahan Mərkəzi tərəfindən III ixtisas qrupu üzrə imtahanlarda iştirak hüququ qazanır. İmtahandan uğurla keçənlər təhsil müddətində dövlət hesabına yataqxana, xüsusi geyim, təqaüd və yeməklə təmin olunurlar. Məzunlara “polis leytenantı” xüsusi və “ehtiyatda olan leytenant” hərbi rütbələri verilməklə daxili işlər orqanlarında müvafiq vəzifələrə təyin edilirlər.