2020-11-04 17:04

Düşmən təxribatlarına və işğalına qarşı döyüş əməliyyatları aparılan ərazilərdə mobil telefon aparatlarının texniki imkanlarından istifadə olunmaqla icazəsiz videoçəkilişlər edilərək Azərbaycan qoşunlarının strateji və əməliyyat planları, dislokasiyası və yerdəyişmələri, şəxsi heyəti, silah və hərbi texnikaları barədə məlumatları əldə etməyə imkan verən müxtəlif videomateriallar yayılıb. Dövlət sirrinin mühafizəsi tədbirlərinə zidd olaraq və müvafiq xəbərdarlıqlara baxmayaraq yayılan videogörüntülər düşmən tərəfindən qoşun hissələrimizin qüvvə və mövqeləri barədə informasiyanın əldə edilməsi, həmçinin kəşfiyyat-təxribat fəaliyyətinin həyata keçirilməsi məqsədləri üçün istifadə olunub. Aşkar edilən faktlar üzrə Dövlət Təhlükəsizliyi Xidmətində cinayət işi başlanılıb və hazırda həmin şəxslərin cinayət əməlləri ilə bağlı istintaq aparılır.

Vüsalə Camal