2021-04-16 12:10

Daxili İşlər Nazirliyi Baş Dövlət Yol Polisi İdarəsi beynəlxalq daşımalar həyata keçirən nəqliyyat vasitələri sahiblərinə və sürücülərə müraciət edib. Rusiyanın hazırda qüvvədə olan qanunvericiliyinə görə, əvvəllər Federasiya ərazisində inzibati xəta törədən xarici daşıyıcıya məxsus nəqliyyat vasitəsi Rusiya ərazisində yalnız inzibati cərimənin ödənilməsindən sonra hərəkət edə bilər. Xarici daşıyıcı və ya onu təmsil edən nümayəndə nəqliyyat vasitəsi Rusiyanın dövlət sərhəd buraxılış məntəqəsinə daxil olduqdan sonra 3 saat ərzində inzibati cəriməni ödəməlidir. Bununla yanaşı, bu il iyulun 7-dən etibarən eyni qaydaların Rusiyanı tərk etmək istəyən xarici daşıyıcıya məxsus nəqliyyat vasitələrinə də şamil olunacağı nəzərdə tutulub. Yəni, xarici daşıyıcıya məxsus nəqliyyat vasitəsi inzibati cərimənin ödənilmədiyi təqdirdə Rusiya ərazisini tərk edə bilməyəcək.

Nərgiz Camal