Azərbaycan və Ermənistan arasında əldə olunan ikitərəfli razılığa və humanizm prinsiplərinə uyğun olaraq Azərbaycan Respublikasının Cinayət Məcəlləsinin müxtəlif maddələri ilə təqsirli bilinərək ölkəmizdə cəza çəkən 4 nəfər - Vaqif Xaçatryan, Gevorg Sujyan, David Davtyan və Viken Eulcekcian bu yaxınlarda Həkəri körpüsündə Azərbaycanın müvafiq orqanlarının nümayəndələri tərəfindən Ermənistana təhvil verilib. Bu barədə Ermənistan Baş naziri Nikol Paşinyan bildirib. Onların Azərbaycanda saxlanıldıqları müddətdə hüquqları tam təmin olunub, səhhətləri və saxlanma şəraitləri beynəlxalq standartlara cavab verib. Məhkumlar, həmçinin Ermənistana göndərilməzdən əvvəl tibbi müayinədən keçirilib və səhhətlərinin normal olması müəyyən edilib. Onların sırasında səhhəti qənaətbəxş olmayan Vaqif Xaçatryana bütün zəruri tibbi yardım göstərilib və daim həkim müayinəsi altında olub.