Canlarını Azərbaycanın ərazi bütövlüyü yolunda qurban verən Vətən müharibəsi şəhidlərinin əziz xatirəsi saat 12-də bütün ölkə ərazisində olduğu kimi, Gəncədə də bir dəqiqəlik sükutla yad olundu, nəqliyyat vasitələrinin hərəkəti dayandırıldı, siqnallar səsləndirildi. Gəncədə sakinlər, ictimaiyyət nümayəndələri and yeri olan Şəhidlər Xiyabanına axın edirlər. Torpaqlarımızın erməni tapdağından qurtulmasında sücaət göstərənlərin xatirəsi ehtiramla yad edilir. Gəncənin 1-ci Qarabağ müharibəsində 90-ı itkin olmaqla 500-ə yaxın şəhidi olub. Vətən müharibəsində isə şəhər 96-sı hərbi, 26-sı mülki olmaqla 122 sakininə qoynunda əbədi yer verib. Allah Şəhidlərimizə rəhmət etsin.