Prezident İlham Əliyev Xocavənd rayonunun Xanoba kəndinə qayıdan sakinlərlə görüşdə Novruz tonqalını qalayıb. Dövlət başçısı bildirib ki, Qarabağ və Şərqi Zəngəzurda artıq 80 mindən çox insan yaşayır, işləyir və təhsil alır. İlham Əliyev qeyd edib ki, “Böyük Qayıdış” proqramı çərçivəsində keçmiş məcburi köçkünlərin doğma torpaqlara qayıdışı davam edir.
İlham Əliyev - Azərbaycan Respublikasının Prezidenti:"Doğurdan da böyük xoşbəxtlikdir. Artıq iki ildir ki, bu diyar işğalçılardan azad edildi. Xanoba kəndi 2023-cü ilin sentyabr ayında işğaldan azad edilmişdi. Və bundan sonra artıq bərpa işləri də başlamışdır. Evlər yenidən tikildi, quruldu. Bütün şərait yaradıldı. Yəni bu şanlı zəfərimiz artıq neçə ildir bizim qürur mənbəyimizdir. Mən 6-cı ildir ki, Novruz bayramını Qarabağda qeyd edirəm. İlk dəfə 2021-ci ildə, ondan sonra da bütün illər boyu Novruz ərəfəsində Qarabağdayam. Və Novruz tonqalını Qarabağda qalayırıq birlikdə. Bu, böyük xoşbəxtlikdir".

19 mart 2026