Tamştatlı müəllim konsepti 2027-ci ilin sentyabrından tez müddətdə həyata keçirilməyəcək. Bunu elm və təhsil naziri Emin Əmrullayev jurnalistlərə açıqlamasında deyib. Emin Əmrullayev bildirib ki, hazırda Azərbaycan məktəblərində tamştatlı müəllim konsepti üzərində işlənir. Məqsəd müəllimlərin məktəbin tamhüquqlu üzvü kimi hiss etməsini təmin etmək və maaş sistemini təkmilləşdirməkdir. Nazir bildirib ki, mövcud statistika müəllimlərin 4–6 saat dərs yükü əsasında aldığı əməkhaqqını ümumi göstəriciyə daxil edir və bu, yanlış təsəvvür yaradır: "Eyni zamanda, müəllimin öz əməkhaqqını artırması üçün yalnız daha çox dərs saatı götürməsi kimi məcburi mexanizm də doğru deyil və dəyişdirilməlidir"- deyə, o bildirib. Nazir qeyd edib ki, yeni sistemdə tam ştatlı müəllimin maaşı ölkə üzrə orta maaşdan ən azı iki dəfə yüksək olmalıdır. E.Əmrullayev bəzi kənd məktəblərində musiqi, təsviri incəsənət fənləri üzrə müəllim çatışmazlığı olduğunu da vurğulayıb. Nazir bu baxımdan saat hesabı maaş sistemindən uzaqlaşmağın zəruri olduğunu hesab edir.