Gəncədə fəaliyyət göstərən topdansatış mağazasında 210 ədəd saxta alkoqollu içki aşkarlanıb. Bu barədə Azərbaycan Qida Təhlükəsizliyi Agentliyi (AQTA) məlumat yayıb. Qurumdan bildirilib ki, baxış zamanı satış sahəsində 98 ədəd 0,7 litrlik və 112 ədəd 0,5 litrlik alkoqollu içkinin saxtalaşdırma əlamətləri aşkar edilib. Müayinələr zamanı müəyyən olunub ki, içkilərin başlıq hissəsi təkrar bərkidilib, üzərində istehsal tarixi və istehsalçı barədə məlumatlar göstərilməyib, saxta VÖEN qeyd olunub və müşayiətedici sənədlər təqdim edilməyib. Aşkarlanan məhsullardan nümunələr götürülərək laborator müayinələrə göndərilib. Faktla bağlı sahibkar barəsində qanunvericiliyə uyğun tədbirlər görülüb.